Monseigneur, je vous escripvis et feis reponce à voz

lettres du dozieme. Je nay peu encore envoyer voz lettres

ne celles que jay escriptes à messieurs de Lange

et Arnolfini, mais jay heu aujourdhuy ung messager

qui ma esté envoyé exprès avec deux rescriptions

de monsieur Garroud, tresorier de lespargne : lune

pour monsieur Grangier de VIm[ille] livres, laultre pour monsieur

d’Aultefort de VIIm[ille], tant de livres. Ausquelles

monsieur Muzy ma faict parelhe reponce comme à vous

pour la partye de trois centz livres. Je renvoye le

messagier qui portera mon despeche.

Au demeurant, monseigneur, je vous supplie

faire ce bien à monsieur lauditeur Faure que de luy aider à sortir

de la prison où il est et voloir mander à monsieur de

Gap ne differer de relascher les deux prisonniers quil ha

qui, comme jentendz, ont estez prins durant la trefve. A

ce que j’entendiz, si par ce moien ledit sieur auditeur Faure ne

sort de ceste peyne, il est pour y tremper bien longuement.

Il vous est serviteur et merite à recevoir ce bien de vous.

Je vous en supplie comme pour lun de mes bons amys.

Monseigneur, je me recommande très humblement à votre

[36B]

bonne grace, priant Notre Seigneur vous donner bonne

et longue vye. De Grenoble, ce XVIe de mars

Votre très humble et hobeyssant

serviteur

Prunier

Consultation